Жас ұрпаққа саналы тәрбие және сапалы білім беру деңгейі ең алдымен мектепалды даярлықты жүргізетін мамандарына, олардың іс-тәжірибесінің қалыптасып, кәсіби шеберлігінің шыңдалуына байланысты екені хақ. 

Бала тәрбиесінде педагог жан-жақты жетілген, білімді, әдістемелік шығармашылық иесі, халықтық дәстүр, әдет-ғұрыппен, салт-сана ерекшеліктерін, әлеуметтік қарым-қатынастар түрлерін кәсіби түрде меңгеруі тиіс. Әсіресе осы кәсіби біліктілік дағдыларын шыңдау олардың тәжірибе жинақтауының ең басты негізі болып табылады. Өйткені, мектепке дейінгі жастағы баланың жеке басының дамуын қамтамасыз етуші, маңызды тәлім-тәрбие өнегесінің бастаушысы, жарқын істердің үлгісі, бала қиялын самғатып, арманын көкке ұмсындырушы басты тұлға педагог. 

2023 жылдың тамыз айының 28 жұлдызынан бастап қыркүйектің 8 аралығында «Өрлеу» біліктілік арттыру ұлттық орталығының ұйымдастыруымен Сайрам ауданындағы Д.Қонаев атындағы мектепте «Мектепалды даярлықтың тәжірибелік және мазмұндық аспектілері» тақырыбында 72 сағатты құрайтын біліктілік арттыру курсы өтті.

Курс барысында жетекшілік еткен тренер Х.Қалиева кәсіби біліктілігімен өзінің жеке педагогикалық мәдениетін көрсете білді. Хадиша Алиасқарқызының ұйымдастыру деңгейі, адамгершілігі, таным-түсінігі, тәрбиесі, ізденімпаздығы, зерттеушілігі курстың алғашқы күнінен байқалды. Хадиша апай жаңалықтың жаршысы ретінде оқытудың тәсілдерін, озық тәжірибелерін сараптауды, үнемі шығармашылық ізденіс үстінде болуды алға тарта келе, курс тыңдаушыларының арасында колобаративті орта қалыптастыруға ықпал етті.

Педагог мамандар курс шеңберінде кәсіби жетілгендерін, кәсіби шеберлігінің шыңдалғандарын және шығармашылық қабілеттерінің толыққанды арта түскенін өздерінің демо сабақтары арқылы ұсына білді. Осы орайда Хадиша Алиасқарқызына алғысымызды айта келе, еңбек жолында шығармашылық табыс тілейміз.