Доимий обуначимиз Рўзимат Камолов таклифи билан Туркистон шаҳридаги Амир Темур номли мактаб янги биносининг очилишида иштирок этдик. Мактаб 300 ўринли, уч қаватли ўқув биносида спортзал ва ошхоналари мавжуд.  

Ушбу янги таълим даргоҳи биносининг зарурлигини мутасадди ташкилотлар олдида асослаб берган собиқ директор Рўзибой Юсупов, ота-оналар қўмитаси раиси Олимжон Исетов, фаол обуначи Олимжон Абдиев, вилоят ва шаҳар маслаҳатининг  собиқ депутатлари Рахим Танирбергенов, Умбет Жусипбаев, Таскул Маҳмудова, жамоат ташкилоти раҳбари Жонтемир Алимов, ҚР “Дўстлик” ҳамжамияти раиси Икромжон Ҳошимжонов каби инсонларнинг ушбу эзгу ишда ҳиссалари салмоқли.                                  

“Жанубий Қозоғистон” газетаси таҳририяти шаҳар, вилоят миқёсидаги анжуманларда ушбу масалани такрор-такрор кўтариб, пировардида ижобий ҳал этилди.      

“Ақнур строй” МЧБ бинони замонавий тарзда сифатли барпо этди. Шаҳар ҳокими ўринбосари Мекенхан Қирқбаев, вилоят ва шаҳар таълим бўлимлари раҳбарлари Ғалимжан Жумашев, Ўразкул Қўлдасовалар билан рамзий тасмани қирқиб, устозу меҳмонларни ичкарига чорлади. 

Ўтган асрнинг 90-йилларида ушбу даргоҳга раҳбарлик чоғида мактабга Амир Темур номи берилишига камарбаста бўлган директор Азимжон Ҳожимуродовнинг руҳи шод бўлсин.