Давлат раҳбари Қўстанай тумани, Майкўл қишлоғидаги «Надеждинка» МЧБда қишлоқ хўжалиги маҳсулотлари ишлаб чиқарувчилар билан учрашди.

Қ. Тўқаевга вилоят ҳокими Қумар Ақсақалов минтақада қишлоқ хўжалигини ривожлантириш чора-тадбирлари ҳақида маълумот берди.

Унинг айтишича, жорий йилда деҳқонлар 5 миллион гектар майдонга экин экишган. Машина-трактор паркини янгилаш, элита уруғлик ғалланинг улуши ҳамда қишлоқ хўжалик экинларининг ҳосилдорлигини ошириш кўзда тутилган.

Давлат раҳбарига вилоятда чорвачилик ва паррандачиликни ривожлантириш борасида ҳам маълумот берилди.

Жумладан, яқин уч йилда 14та сутчилик фермасига сармоя жалб этилади. 44та чорвачилик мажмуаси, иккита йирик паррандачилик фабрикаси барпо этилмоқда.

Ушбу лойиҳалар ҳисобидан вилоятда сут ва гўшт етиштириш ҳажми 1,4 баравар, парранда гўшти етиштириш эса 5 баравар кўпаяди.

Бундан ташқари, қатор сармоявий лойиҳаларни амалга ошириш натижасида уч йил мобайнида чуқур қайта ишланган маҳсулотлар улушини 70 фоизга етказиш вазифаси қўйилди.

Президент “Надеждинка” МЧБ далаларида бўлиб, қишлоқ хўжалиги меҳнаткашлари билан суҳбатлашди.

Давлат раҳбари ғалла ҳосилини ўз вақтида йиғиб олиш, меҳнат унумдорлигини ошириш, аграр соҳага янги технологияларни жорий этиш, қишлоқ хўжалиги ерларидан мақсадли фойдаланиш муҳимлигини таъкидлади.

Қ. Тўқаев давлат маҳаллий деҳқон ва чорвадорларни қўллаб-қувватлаш ва истиқболли лойиҳаларни амалга ошираётган тадбиркорларга ёрдам беришда давом этишини таъкидлади.