Туркистон вилоятида туризм соҳасини ривожлантириш мақсадида 174та сайёҳлик иншооти ягона тизимга киритилди. Бу ҳақда «Open Turkistan» сайёҳлик ахборот маркази бош директори Асқар Абубакиров маълум қилди.

– Минтақада туризмни ривожлантириш борасида табиий ва тарихий-маданий жойларни ягона сайёҳлик маҳсулотига айлантиришга эътибор қаратилмоқда. Туркистон шаҳри билан бирга, Ақсу-Жабағли, Сайрам-Ўгем, Қоратов ҳудуди, тоғ даралари, қадимий шаҳарлар, муқаддас қадамжолар, қишлоқ ва гастрономик йўналишлар қамралмоқда. Бу хизматни рақамлаштириш ва маълумотлар оммабоплигини ошириш мақсадида қатор лойиҳалар амалга оширилмоқда. «Turkistan Travel Guide», «Turkistan Weekend», «Turkistan Brand», «Amazing Turkistan», «AuylTourism», «Turkistan Vibe» лойиҳалари шулар жумласидан. Ягона тизимда иншоотларнинг жойлашуви, алоқа маълумотлари, инфратузилма, хизматлар ва уларга бориш йўллари мавжуд. Бундан ташқари, ҚР навигация, рақамли йўналишлар, кўп тилли маълумотлар каталоглари, сайёҳлар учун чат-ботлар ва гидларнинг рақамли профилларини жорий этиш бўйича ҳам ишлар олиб борилмоқда, – деди марказ раҳбари.

Шунингдек, Ўзбекистон, Хитой, Туркия ва Марказий Осиё мамлакатлари билан ҳамкорликда ишлар олиб борилмоқда. Бундан ташқари, сайёҳларнинг нафақат Туркистон шаҳрида, балки вилоятнинг бошқа ҳудудларига ҳам ташриф буюришини таъминлаш мақсадида бир неча кунлик сайёҳлик йўналишлари тайёрланмоқда. Асосан, Туркистон–Ўтрор–Арслонбоб, Туркистон–Кентов–Қоратов, Туркистон–Сайрам–Ўгем, шунингдек, Тулкибош ва Тўлебий туманларининг йўналишлари шулар жумласидан.