Туркистон шаҳридаги «Дўстлик уйи»да «Минг бола» республика маданий-маърифий лойиҳасининг вилоят якуний танлови бўлиб ўтди.

Тадбирда вилоят «Жамоат тотувлиги» ДКК раҳбари Эльмира Жанғазиева иштирок этиб, танлов иштирокчиларига муваффақият тилади. 

«Минг бола» лойиҳаси ёшларда китоб ўқиш маданиятини шакллантириш, давлат тилини ўрганишга қизиқишини ошириш, миллий ва маънавий қадриятларни тарғиб қилиш, мамлакатда бирлик ва тотувликни мустаҳкамлашга қаратилган.

Бу йилги вилоят босқичи икки номинация бўйича ўтказилди.

«Ижтимоий тармоқларда ифодали ўқиш» номинациясида турли этнос вакиллари бўлган ёшлар Муқағали Мақатаев таваллудининг 95 йиллиги муносабати билан шоир асарларини ифодали ўқиб, видеолавҳаларни ижтимоий тармоқларга жойладилар.

Натижада, Сайрам туманидан Меҳруза Раҳмонқулова I ўринни, Сайрам туманидан Робия Фарҳодова II ўринни, Ўрдабоши туманидан Илья Абрамов III ўринни эгаллади.

Шунингдек, онлайн танловда фаол иштирок этиб, М. Мақатаев шеърларини ёддан ва ифодали ўқиган ёшларга ташаккурномалар топширилди.

«Бирликка чорлаган» мусиқий танловда туман ва шаҳарлардан саралаб олинган 21 нафар санъаткор қозоқ халқининг анъанавий, миллий ва классик асарларини миллий чолғу асбобларида ижро этди. 

Ушбу номинацияда, Сариоғоч туманидан Сарвар Умурдинов I ўринни, Саврон туманидан Абдумалик Алитдинов II ўринни, Кентов шаҳридан Мария Чулкова III ўринни қўлга киритди.

Биринчи ўрин соҳиби Сарвар Умурдинов республика гала-концертида иштирок этиш учун йўлланма олди.