Туркистондаги қурилиш майдончаларини оралаган вилоят ҳокими Ўмирзақ Шўкеев қурилиш ишлари тўлиқ битгач, биноларнинг  атрофи ободонлаштирилган ҳолда фойдаланишга топширилиши зарурлигини таъкидлади. Ушбу топшириқ нафақат ижтимоий иншоотлар қураётган, балки уй-жой қурилишида машғул бўлган барча компанияларга ҳам тааллуқли.
Шаҳарда қад ростлаётган янги кўп қаватли уйларнинг қурилиши билан танишган ҳоким, сармоядорлар билан ҳам учрашди.  
– Қурилиш ишларини кўкаламзорлаштириш ишлари билан якунлаш керак. Бино қурилиб битгач, атрофини ободонлаштириш, дарахтлар ўтқазиб, кўкаламзорлаштириш мақсадга мувофиқдир, – деди вилоят ҳокими.
Туркистон шаҳридаги кимё-биология йўналишидаги  Назарбаев Заковат мактаби қурилиши янги ўқув йилида битиб, фойдаланишга топширилади. Таълим даргоҳининг  умумий ер майдони – 22 300 м2.
Ўмирзақ Естайули муассасани замонавий воситалар билан таъминлашда, энг аввало, сифатга эътибор қаратилиши зарурлигини уқтирди.
Шаҳарда 25та бригадага мўлжалланган вилоят тез ёрдам станцияси қурилиши ҳам йил охирида ниҳоясига етади. Вилоят ҳокими юқоридаги иншоотлардан сўнг Яссавий кўчаси бўйидаги истироҳат боғига ташриф буюриб, у ердаги ишларни кўздан кечирди.