Ертай Алтаев “Алатау” медиа марказига ташриф буюриб, унинг фаолияти билан яқиндан танишди. 

300 ўринга мўлжалланган 4 қаватли замонавий марказда “Туркистон” телеканали жамоаси, Ахборот-таҳлил маркази, вилоят минтақавий алоқалар хизмати мутахассислари, республика оммавий ахборот воситалари (“Хабар”, “24кз”, “Қазақстан” телеканаллари), “Туркистон” телеканали ва учта маҳаллий газета таҳририятлари мухбирлари фаолият юритмоқда.

Медиа марказнинг ҳар бир қаватида муҳаррирлар хонаси, 4та видеомонтаж ва овоз ёзиш ҳамда радиостудия мавжуд.

ОАВ вакиллари фаолият юритиши учун журналистлар хоналари, телестудия, монтаж хоналари, овоз ёзиш студияси, анжуманлар зали, ошхона мавжуд.

Вилоят ҳокими ўринбосари “TURKISTAN” телеканалининг фаолияти билан яқиндан танишиб, галдаги режаларини тинглади.

– Мақсадимиз – телеканални янги босқичга кўтариш, маънавий-маданий йўналишда янги лойиҳалар ишлаб чиқиш. Ижобий ташаббусларни қўллаб-қувватлашга тайёрмиз. Техник ва моддий база жуда кучли. Замонавий технологиялар қудрати, ижодкор мутахассислар маҳорати билан янада юксак марраларни забт этишимизга ишончим комил, – деди Ертай Кенжебекули.

“TURKISTAN” телеканали 2021 йил 22 мартдан ўз фаолиятини бошлаган. Эфир вақти кунига 18 соат. 100 нафардан зиёд ходимга эга телеканал 2022 йилда “Энг яхши ҳудудий телеканал” номинациясида “Тұмар” мукофотини қўлга киритган эди.