Туркистонда ёзувчи, драматург, “Қозоғистон Меҳнат қаҳрамони” Дулат Исабеков таваллудининг 80 йиллигига бағишланган тантанали тадбирлар ўтди. Туркистон вилояти ҳокими Дархан Сатибалди ва вилоят жамоатчилиги, китобхонлар адибга ҳурмат кўрсатиб, ижодига юксак баҳо берди. Юбилей доирасида Д. Исабековнинг ҳаёти ва ижодига бағишланган китоб кўргазмаси ташкил этилди.

Тантанали тадбир Туркистон мусиқали драма театрида юбилей соҳибининг “Бөрте” спектакли билан давом этди. Тарихий асарни томоша қилиш учун нафақат Туркистон вилояти, балки бошқа вилоятлардан ҳам томошабинлар махсус ташриф буюришди.

Спектакль бошланишидан аввал вилоят ҳокими Дархан Сатибалди таниқли адибни юбилей билан табриклаб, унга ҳурмат кўрсатди.

– Сизни 80 ёшингиз билан чин қалбимдан табриклайман! Бу юбилейни Туркистон тимсолида нишонлаётганимиздан хурсандмиз. Сиз нафақат адабиёт, балки журналистика, драматургия соҳасида ҳам ўз йўлингизни очдингиз. Туғилган жойингиз – Муқаддас Туркистон вилоятига келиб, юбилейингизни нишонлаш биз учун шараф. Яқинда Давлат раҳбари Қасим-Жўмарт Тўқаев Туркистонга маънавий-тарихий пойтахт мақомини беришни таклиф қилган эди. Бу борада ишлар олиб борилмоқда. Туркистон Қозоқ хонлигининг пойтахти бўлган буюк шаҳар. Бу ерда тарихий қарорлар қабул қилинган. Туркистонни ривожлантиришдан асосий мақсадимиз минтақани туркий оламнинг маънавий-маданий марказига айлантиришдир. Бу мақсадни рўёбга чиқаришда сиз каби ёзувчиларнинг хизматлари беқиёс, – деди вилоят ҳокими.