Анъанага кўра, олтин куз фаслининг дастлабки ойи биринчи санасида ўз мустақиллигининг тўртинчи ўн йиллигида жаҳон миқёсидаги иқтисодий таназзул синовларини сабот билан енгиб келаётган мамлакатимиз учун муҳим иқтисодий йўналишлар белгилаб берилди. 

Муҳтарам Президентимиз, Қозоғистон халқи Ассамблеяси раиси Қасим-Жўмарт Кемелули Тўқаев ушбу муҳим ҳужжат ижроси муддатини уч йилга белгилади. Давлатимиз мамлакат маҳсулот ишлаб чиқарувчиларини ҳимоя қилиши мезони теран таъкидланди. Президент режаланаётган ислоҳотларнинг асосий мақсади – 2029 йилга бориб, миллий иқтисодиёт кўламини икки баравар ошириб, 450 миллиард долларга етказишдек мураккаб вазифани қўйди. Бу – жиддий топшириқ. Зеро, мамлакатимизнинг барқарор келажаги учун ушбу стратегик вазифани амалга оширишимиз ўта муҳим. 

Барча фуқаролар, айниқса, ёшлар асрдан асрга эъзозланиб келаётган қадриятларимизни улуғлаб, ватанпарварлик, меҳнатсеварлик, интизом, масъулият, тежамкорлик, адолатпарварлик фазилатларини намоён этишса, забт этилмайдиган довон йўқлиги ифтихор ила таъкидланди. 

Туркий оламнинг маънавий пойтахти, халқаро сайёҳлик маскани Туркистон шаҳри вилоят маркази бўлгандан буён ўтган беш йилдаги жадал тараққиёти, амалга оширилган оламшумул қурилиш, ободончилик, кўкаламзорлаштириш каби вазифалар давлатимиз томонидан белгиланган, бу албатта ҳаётга татбиқ этилиши жоиз. ҚР Президенти Мактубда белгилаган вазифалар жамиятда этнослараро тотувлик, бирлик, ҳамжиҳатлик, ўзаро ҳурмат ва иззат каби юксак хислатларни таъминлашига ишончимиз комил. Ҳар биримиз умумхалқ манфаатлари йўлидаги вазифалар ижросига муносиб ҳисса қўшайлик.